– Komponista, musihkkár ja kulturbargi Herman Rundberg, vaikko lea nuorra, lea juo mihtilmas ja dovddus kulturbargi. Son ii leat oahpis dušše midjiide Romssa fylkkas, muhto olbmuide miehtá riikka. Mii atnit árvvus áŋgiruššama ja sávvat sutnje ollu lihku, cealká fylkkasátnejođiheaddji Kristina Torbergsen juolludeami oktavuođas.

Herman Rundberg lea ieš dadjan man dehálaš lea áimmahuššat árbevieruid, ja su vuosttaš álbuma "Manne", almmuhuvvui 2023, son válddii de duođas sámegiela ja juoigama iežas musihkkii.

Okta boađus lei Gáivuotna - Kåfjord luohti, maid suohkan dán geasi dohkkehii virggálaš luohtin.

Ollu doaimmat

Rundberg stuorámus vuoitu musihkkárin lei go son ovttas Mari Boine:in ja Svein Schultziin, oaččui Amanda-bálkkašumi Guovdageainnu stuimmit(2008) filmma filbmamusihka ovddas. 

Dan rájes lea son bargan viidát komposišuvnnaiguin ja jietnačájáhusaiguin, sihke lávdedáiddabuvttademiin ja filmmain.

Son lea musihkkárin bargan ja lea máŋggaid jagiid johtán miehtá riikka joavkkuin Violet Road:n ja Alit Boazu:n.

Herman Rundberg oaččui gieskat Kardemommme-stipeandda vuosttaš sámi artistan, dat čájeha man bures mearrasámi ja davvinorgalaš musihkka lea doaibman ja lea oidnosis miehtá riikka.