Fidnooahppin dus galgá leat sihke bargošiehtadus oahppofitnodagain ja dohkkehuvvon oahpposoahpamuš.

Oahpposoahpamuš lea geatnegahtti šiehtadus gaskal du guhte leat fidnooahppi, oahppofitnodaga, fylkkagieldda ja vejolaš oahpahuskantuvrra. Bealit leat geatnegahtton addit dutnje oahpu šihttojuvvon oahppoáiggis.

Nugo buot earáge bargiin lea de galgá dus maiddái leat bargošiehtadus fitnodagain gos leat barggus. Bargošiehtadusa gaskal du ja oahppofitnodaga lea šiehtadus mii mearrida earret eará bargoáiggi ja bálkká. Bargošiehtadus galgá leat fámus seammá guhká go oahpposoahpamuš. Jus áiggut joatkit barggu fitnodagas maŋŋá go leat čađahan oahppoáiggi, de fertet dahkat ođđa bargošiehtadusa.

Go šiehtadat oahpposaji oahppofitnodagas, de čállojuvvo oahpposoahpamuš dutnje. Go oahpposoahpamuš lea gárvvis, de dat sáddejuvvo vuolláičállimii elektrovnnalaččat. Oaččut SMS mas čuožžu ahte don galgat vuolláičállit Romssa fylkkasuohkana dokumeanta. Lea dehálaš ahte vuolláičálát áigemearrái.

Go oahpposoahpamuš lea vuolláičállojuvvon, de sáhtát oaidnit dan Vigo-áppas. 

Dus lea seamma vuoigatvuođat ja geatnegasvuođat go eará bargiin fitnodagas.

Loga eanet vilbli.no:s

Du lagamus doarjjaolmmoš oahppofitnodagas lea fágalaš jođiheaddji ja bagadalli. Soai galgaba ovttas sihkkarastit ahte fidnooahppin oaččut dan oahpahusa masa dus lea riekti.

Jus oahppofitnodat lea miellahttun muhtin oahpahuskantuvrras, de oahpahuskantuvrra ráđđeaddit maiddái čuvvolit.

Oahppofitnodagas galgá leat siskkáldas oahpahusplána mii čájeha guđe bargodoaimmaid galggat bargat vai olahat oahppoplána gelbbolašvuođamihttomeriid.

Plánas galgá maiddái boahtit ovdan goas doaimmat galget čađahuvvot ja geas lea ovddasvástádus čuovvoleapmái. Jahkebealárvvoštallan ja jahkebealságastallamiid dáhtonat berrejit maid leat mielde plánas.

Siskkáldas plána galgá heivehuvvot oahppofitnodaga bargguide ja du persovnnalaš fágalaš ovdáneapmái.

Fitnooahppin de lea dus vuoigatvuohta oaččut jahkebealsagastallama fágajođiheaddjin ja/dahje bagadallin. Jahkebealsagastallamis galgat oaččut bagadallama mo don sáhtát ovdánit viidásit ja addit buori vuođu plánet viidásit oahppu. Siskkáldas plána oahppamii galgá geavahuvvot sagastallamis, muhto lea vuogas sagastallat maiddái loaktima, jávkama, bargodoaimmaid ja movtta birra.

Fidnoohppiid ja oahpaheaddjikandidáhtaid bálká sáhttá rievdadallat das makkár fága bargu dus lea ja lea go fitnodat organiseren dahje ii. Jus don barggat fitnodagas mas lea tariffašiehtadus, de lea ráhkaduvvon sierra bálkámearit fidnoohppiide. Jus don barggat fitnodagas mas ii leat tariffašiehtadus sáhttá bálká rievdadallat fitnodagas fitnodahkii.

Ovdamearka mo bálkká sáhttá juohkit:

• 1. jahkebealli: 30 % fágabargibálkkás
• 2. jahkebealli: 40 % fágabargibálkkás
• 3. jahkebealli: 50 % fágabargibálkkás
• 4. jahkebealli: 80 % fágabargibálkkás

Jus dutnje šaddet váttis fitnodagas gos leat fidnooahppin, de lea deahálaš váldit dán ášši ovdan fágalaš jođiheddjiin, bagadalliin dahje bearráigeahččiin nu johtilit go vejolaš.

Jus du fitnodat lea miellahttun muhtun oahpahuskantuvrras, de sáhtát váldit oktavuođa singuin. Fylkkagielddain sáhttá maiddái váldit oktavuođa dán čujuhussii: fagopplering@tromsfylke.no dahje riŋget telefonguovddážii.

Sáhtát maid váldit oktavuođa ohppiid- ja fidnooahppiidáittardeddjiin, guhte rávvet ja bagadallá du vuoigatvuođaid birra ja váttis áššiin.

Du oahppofitnodagas lea geatnegasvuohta dieđihit du geahččaleapmái. Oahppofitnodat galgá dan dahkat guokte mánu ovdal go oahppoáigi lea dievvan. Fylkkagielda dohkkeha ja sádde dieđiheami viidásat fága geahččaleamelávdegoddái.

Dieđiheapmi geahččaleapmái

Botket

Jus buohccát dahje eará sivaid geažil botket oahpahusa guhkit áigái, de sáhtát oažžut guhkit oahpahusáiggi, vai sáhtát čađahit oahpahusa maid leat massán. Mii ávžžuhit guhkidit oahpahusáiggi jus jávká eanet go 2 mánu. Oahppofitnodat dieđiha fylkkagildii ahte don leat jávkan ja ahte dii lehpet šiehtadan guhkidit oahppoáiggi. Oaččut reivve mas lea ođđa luohpanbeaivi oahpposoahpamuš.

Dus lea vuoigatvuohta oažžut bálkká go leat buohccindieđihuvvon seamma njuolggadusaid mielde go eará bargiin.

Fidnohárjehalliin lea dus vuoigatvuohta geavahit váhnenvirgelobi seamma eavttuid mielde go eará bargiin.

Oahppodili heaittihit

Oahpposoahpamuša sáhttá loahpahit jus goappašat bealit miehtaba dasa. Váldde oktavuođa oahppofitnodagain dahje oahpahuskantuvrrain jus háliidat heaittihit oahpahusdili. Oahppofitnodat dahje oahpahuskantuvra sádde dieđu fylkkagildii eDialog bokte.

Jus dušše okta bealli háliida heaittihit oahpposoahpamuša, de galgá ohcat fylkasuohkanii eDialog bokte. Fylkkasuohkan meannuda ášši, dahká mearrádusa ja mearrida goas vejolaš oahppodilli galgá loahpahuvvot. Jus lea fitnodat guhte háliida loahpahit soahpamuša, de ferte oahppofitnodat duođaštit manne háliida loahpahit soahpamuša. Dus lea vejolašvuođa buktit cealkámuša ovdal go mearrádus dahkkojuvvo. Oahppo- ja bargodilli bistá dassážii go oahpposoahpamuš lea mearriduvvon heaittihuvvot.

Jus oahpposoahpamuša loahpahuvvo, de sáddejit dutnje gelbbolašvuođaduođaštusa duođaštussan ahte leat čađahan oahpu fitnodagas.