Oza doarjja

2024 doaibmabijuide ruhtajuolludeapmi lea mearriduvvon. Dát ožžot eaktodáhtolašvuođadoarjaga 2024:s.

Sáddes raportta maŋŋá go doaibmabidju lea loahpahuvvon elektrovnnalaš skoviin: 

Raporterenskovvi

Ulbmil ja olahusjoavku 

Romssa fylkkasuohkan háliida movttiidahttit eaktodáhtolaš bargguid miehtá fylkka, eanet buriid ja govttolaš deaivvadanbáikkiid, aktivitehtaid ja vásáhusaid bokte mat leat oaivvilduvvon mánáide ja nuoraide ja nuorra rávesolbmuide. 

Doarjjaortnet galgá:

• movttiidahttit eaktodáhtolaš bargguide Romssas 
• láhčit dilálašvuođaid eanet vásihusaide ja doaimmaide miehtá fylkka mat čatnasit birrasii, dearvvašvuhtii, kultuvrii, valáštallamii ja olggustallamii 
• váikkuhit eanet oassálastima ja fátmmasteami
• váikkuhit vai mánát, nuorat ja nuorra rávisolbmot besset eallit aktiivvalaččat ja ahte fylkkas leat oadjebas deaivvadanbáikkit 
• ráhkadit eanet deaivvadanbáikkiid

Geat sáhttet ohcat

Eaktodáhtolaš joavkkut ja organisašuvnnat mat leat registrerejuvvon Eaktodáhtolašregistarii. Ohcamuš galgá sáddejuvvot organisašuvnna fylkkasearvi dahje regionála ossodahka. Organisašuvnnat main ii leat fylkasearvi dahje regionála oassi, sáhttet ohcat njuolga.

Maid sáhttit doarjut

Doaibmabijut mat duođaštit eaktodáhtolaš, bálkkáhis barggu Romssa fylkka ássiid ovddas. Sáhttit addit doarjaga narkotihkkakeahtes doaimmaide mat dagahit oassálastima ja áŋgiruššama. Doarjja sáhttá addot sihke eaŋkil doaluide ja guhkesáiggi doaimmaide dahje prošeavttaide.

Vuođđojurdaga mielde eai juolluduvvo ruđat doaimmaide mat leat árvvoštallojuvvon dahje gullet eará fylkkasuohkana doarjjaortnegiidda. 

Mii ii dorjojuvvo 

• doaibmabijut maidda mánát, nuorat dahje nuorra rávisolbmot eai searvva
• doaibmabijut mat eai leat oaivvilduvvon mánáide, nuoraide dahje nuorra rávisolbmuide
• doaibmabijut eaktodáhtolaš áŋgiruššama haga
• doaibmabijut maidda eaktodáhtolaš bargit ožžot diibmobálkká dahje bálkká go veahkehit
• doarjja kontingentii, miellahtto- ja hárjehallangoluide
• dábálaš doaibmabarggut ja reaiddut
• doaimmat mat leat plánejuvvon čađahuvvot ovdal doarjagiid juolludeami meannudeami

Mo ohcat 

Elektrovnnalaš ohcanskovvi galgá geavahuvvot.

Ohcamušas ferte leat mielde: 

• maid áigu čađahit
• gos ja goas doaibmabidju čađahuvvo
• guđe ulbmilat doaibmabijuin leat
• geat leat ulbmiljoavkkut ja makkár ilu ja ávkki sii ožžot das
• man ollugat leat plánejuvvon searvat ja mo sin rekrutteret
• čilget eaktodáhtolaš barggu viidodaga ja ovddasvástádusa 

Ohcamis galgá leat doaibmabiju bušeahtta, ja ohcansubmi. Eará ruhtadeapmi, ja lea go ohccojuvvon vai lea go ožžon doarjaga eará ruhtadangálduin, galgá almmuhuvvot.

Eavttut

• doaibmabijuin galget leat dieđut rabas digitála vuođđovuogádagain
• doaibmabijut galget sihkkarastit buori olahahttivuođa
• doarjjaoažžu galgá almmuhit ahte Romssa fylkkasuohkan lea dorjon doaibmabiju
• Romssa fylkkasuohkana logo galgá oidnot ovdanbuktinávdnasiin mii vejolaččat ráhkaduvvo doaibmabidjui

Ohcanáigemearri

lea juovlamánu 1. b. boahtte jahkái.

Jus leat ruđat báhcán bušeahttapostii, de dat almmuhuvvojit maŋŋá jahkemolsuma, árrat jagi álggu.

Ohcamiid árvvoštallan 

Ruđat juogaduvvojit ollislaš árvvoštallama vuođul. Ruđaid juogadeamis deattuha fylkkasuohkan gokčat iešguđetlágan beroštumiid ja doaimmaid girjáivuođa, buori geográfalaš ja demográfalaš viidodaga.

Álggus ohcamiin iskojuvvo leatgo dárbbašlaš dieđut boahtán sisa. Dárbbu mielde sáhttá fylkkasuohkan jearrat lassidieđuid ovdal go ášši meannuduvvo. 

Maŋŋil vuosttaš geahčadeami meannuduvvojit ohcamat ja árvalus ráhkaduvvo árvvoštallama vuođul, mii lea ortnega njuolggadusaid mielde.

Árvalus ovddiduvvo kultuvrra ja dearvvašvuođa váldolávdegoddái, mii fas mearrida. Ruđat juogaduvvojit oktii jagis. Buot ohccit ožžot doarjjareivve go proseassa lea loahpahuvvon. Dábálaš meannudanáigi lea 1-3 mánu. Ruđat máksojuvvojit dađistaga.

Áššemeannudeapmi čuovvu hálddašanlága mearrádusaid.

Váidinvejolašvuohta

Mearrádusas lea váidinvuoigatvuohta, gč. hálddašanlága § 28.Váidima galgá sáddet Romssa fylkkasuohkanii golmma vahku siste dan rájes mearrádus lea boahtán, gč. hálddašanlága § 29. Váidaga hápmi ja sisdoallu lea aiddostahttojuvvon hálddašanlága § 32:s. Váidin sáddejuvvo čujuhussii postmottak@tromsfylke.no. Jus fylkkasuohkan doalaha mearrádusas maŋŋá go váidalus lea boahtán, de sáddejuvvo váidalus fylkkasuohkana váiddalávdegoddái. Váiddalávdegotti mearrádus lea loahpalaš. 

Máksin 

Fylkkasuohkan máksá doarjaga fakturá mielde maŋŋá go doaibmabidju lea čađahuvvon. Ohccit geat ožžot doarjaga, galget sáddet fakturá fylkkasuohkanii ovdal áigemeari, ja nu mo muđui lea čilgejuvvon juolludusreivves.

Sáddes midjiide faktura

Raporteren 

Doarjjaoažžut galget raporteret Romssa fylkkasuohkana digitála raporterenskovi ja doarjjareivve mielde.

Bearráigeahččan

Romssa fylkkasuohkanis lea vuoigatvuohta oaidnit ja bearráigeahččat ruđaid geavaheami, maiddái mielddusdásis. Fylkkasuohkan sáhttá gáibidit ruđaid ruovttoluotta jus ohcama ja raportta dieđut leat boastut, dahje jus ruhta ii geavahuvvo nugo lei jurddašuvvon. 

Fápmuiboahtin

Njuolggadusat bohte fápmui čakčamánu 2024 rájes.

Politihkalaš mearrádusat 

• Reviderejuvvon njuolggadusat mearriduvvojedje váldolávdegottis kultuvrra ja dearvvašvuođa 27.09.24 sak 60/24
• Eaktodáhtolašvuođadoarjaga juolludeapmi 2024:s mearriduvvui váldolávdegottis kultuvrra ja dearvvašvuođa 13.05.24 sak 31/24
• Njuolggadusat mearriduvvojedje váldolávdegottis kultuvrra ja dearvvašvuođa 20.02.24 sak 9/24
• Bušeahtta mearriduvvui Fylkkadikkis 05.12.23 sak 56/23